Um Skólann

Tónskóli Eddu Borg var stofnaður haustið 1989.

Í skólanum er kennt á flest öll hljóðfæri úr öllum hljóðfærafjölskyldunum og taka nemendur próf samkvæmt námskrá útgefinni af Menntamálaráðuneytinu.

Einnig hefur skólinn öfluga námskeiðadeild, fyrir fólk á öllum aldri, en hún er alltaf að verða vinsælli hjá þeim sem ekki vilja fara hina hefðbundnu klassísku leið.

Rythmískri deild hefur verið aukið við námsframboð í skólanum þar sem námskrá í Rytmsíku tónlistarnámi hefur loksins litið dagsins ljós.

Skólinn hefur verið með skemmtileg námskeið, þegar næg þátttaka fæst, handa börnum 3-5 ára sem kallast Ding Dong og Ungbarnadeild fyrir börn 9 mánaða og eldri og foreldra þeirra.

Mikil áhersla hefur alltaf verið lögð á að nemendur komi fram á tónleikum eftir því sem námsgeta segir til um og læri fágaða og góða framkomu.

Til að kynnast betur skólastarfinu eða til að fá frekari upplýsingar, er bent á að skoða betur heimasíðuna skólans, sem er alltaf í stöðugri þróun, eða hafa samband við skrifstofu skólans í síma: 557-3452 eða með tölvupósti:  ritari@teb.is   eða  teb@teb.is

Um skólann

Stutt ágrip um sögu skólans:

Tónskóli Eddu Borg var stofnaður haustið 1989.

Skólinn hóf starfsemi sína í Seljakirkju og var þá eingöngu kennd hópkennsla í forskóla. Kennslan fór fram í kirkjunni sjálfri og öðrum safnaðarsalnum. Mikil áhersla var lögð á traustan grunn hljóðfæranámsins og haldið vel utanum forskólakennsluna. Skrifstofa skólans, öll gögn og skólahljóðfæri vorur geymd í tveimur pappakössum í læstum skáp á eftir hæð kirkjunnar.

Það sýndi sig strax á fyrsta árinu að mikil þörf var fyrir tónlistarskóla í Seljahverfi og var eftirspurn eftir forskóla og hljóðfæranámi gríðarleg. Ári seinna tók skólinn á leigu húsnæðið í Hólmaseli 4-6 til að mæta aukinni eftirspurn og hefur verið þar síðan.

Á öðru starfsári skólans var kennt á píanó og trompet auk forskóla. Einungis var um tvær kennslustofur að ræða. Og þar sem enga styrki var að fá til hljóðfærakaupa flutti Edda Borg sitt eigið píanó í aðra kennslustofuna og fékk flygil að láni frá bróður sínum til að hafa í hinni stofunni.  Þrátt fyrir hrörleg húsakynni var mikið líf og fjör innan veggja skólans og blómleg tónlistarkennsla. Það var þá sem skólinn fékk þau ummæli að hann væri “lítill skóli með alveg hrikalega stórt hjarta”. Hafa kennarar og starfsfólk allar götur síðan reynt að gera þessi orð að einkunnarorðum sínum.

Um tíma leigði Gítarskóli þeirra Björns Thoroddsen og Friðriks Karlssonar hluta húsnæðisins. Gítarskólinn flutti sig um set og fór skólinn þá að bjóða upp á ýmiskonar námskeið.

Eftir að húsnæðið komst í eigu Íþrótta- og Tómstundaráðs Reykjavíkur var því breytt til að geta þjónað betur starfsemi tónlistarskóla.

Í dag er skólinn kominn í glæsilegt húsnæði, Kleifarseli 18, 2.hæð, þar sem aðstaða nemenda og kennara er til fyrirmyndar. Skólinn hefur nú 7 kennslustofur til umráða, þar af lítinn sal fyrir samspil, upptökuaðstöðu, miðrými, skrifstofu fyrir skólastjóra og ritara, bókasafn þar sem kennarar hafa góða vinnuaðstöðu og eldhús.

Allir tónleikar á vegum skólans eru haldnir í Seljakirkju, Breiðholtskirkju og/eða  í húsakynnum skólans.

Aftur Upp